Presidenti i Shteteve të Bashkuara, Donald Trump, ka njoftuar rritjen e tarifave doganore për eksportet e Koresë së Jugut nga 15 në 25 për qind, duke akuzuar Seulin se ka dështuar të ratifikojë me shpejtësi marrëveshjen tregtare me Uashingtonin.

Në një postim në Truth Social, Trump tha se rritja e tarifave vjen si pasojë e vonesave në miratimin e marrëveshjes nga Parlamenti i Koresë së Jugut. Tarifat e reja do të aplikohen për automjetet, lëndën e drurit, produktet farmaceutike dhe mallra të tjera të përfshira në tarifën bazë reciproke.

Shtëpia e Bardhë ende nuk ka nxjerrë një urdhër ekzekutiv për zbatimin e vendimit. Ndërkohë, presidenca koreano-jugore deklaroi se nuk ka marrë njoftim zyrtar nga pala amerikane dhe se autoritetet do të zhvillojnë konsultime urgjente.

Marrëveshja tregtare mes dy vendeve ishte shpallur në korrik, duke parashikuar uljen e tarifave në këmbim të investimeve koreano-jugore prej 350 miliardë dollarësh në industri kyçe amerikane.

Rritja e tarifave shihet si shqetësuese për ekonominë e Koresë së Jugut, e cila varet ndjeshëm nga eksportet, me SHBA-në si një nga tregjet kryesore.